Milandagi birinchi kunim

Ertalabki Sayohat

Kunim juda erta boshlandi, chunki mening ofisim o‘zim yashaydigan shahar — Turinda emas, balki Italiyaning moda poytaxti — Milanda joylashgan. Porta Nuovadan poyezdga o‘tirib, Milano Centrale stansiyasiga yo‘l oldim.

Kelish va Italyancha Kayfiyat

Milanga yetib kelganimda, ofisga yo‘l oldim — u Milano Centralega juda yaqin joylashgan. Biroz bo‘sh vaqtim bor edi, shuning uchun yaqin atrofdagi kichkina qahvaxonaga kirdim. Kapuchino va kornetto bilan haqiqiy italyancha tongni his qildim — xuddi o‘zimni italyan singari tuyib, ofis tomon yo‘l oldim. Meni u yerda hamkasblarim kutib olishdi. Ofis oddiy: stol, stul, ortiqcha hech nima yo'q. Ammo frontend dasturchi uchun eng muhimi — yaxshi internet, noutbuk va qulay muhit!

Iliq Kutib Olish

Hamkasblarim juda samimiy va ochiqko‘ngil odamlar ekan. Eng qiziq tomoni — ular O‘zbekistondan xabardor, hatto ba'zilari u yerga yaqinda sayohat qilgan ekan! Ular O‘zbekistonni eng chiroyli va mehmondo‘st mamlakatlardan biri sifatida tilga olishdi. Bu meni hayratga soldi, ayniqsa yaqinda yana bir italiyalik do‘stim ham yurtimizga sayohat qilib, menga palov yeyayotgan suratlarini yuborgan edi!

Mening Loyiham

Men ishlayotgan loyiha — thefacultyapp deb ataladi. Bu platforma talabalarga Italiyadagi universitetlarga o‘qishga kirishda yordam beradi. Men ayni paytda uning yangi veb-versiyasini ishlab chiqmoqdaman. Bu ayniqsa xorijiy talabalar uchun foydali. Agar siz ham Italiya universitetlariga qiziqsangiz, saytdan bir ko‘z yugurtirib o‘ting: thefacultyapp.com

Jamoa bilan Tushlik

Tushlik paytida hamkasblar bilan yaqin atrofdagi restoranga bordik. Men "Bella Napoli" pittsasini tanladim — lekin bu yil Neapolga borib, haqiqiy neapolitan pittsasini tatib ko‘rishga niyatim bor! Yoqimli suhbatlardan so‘ng ishga qaytdik va kunni davom ettirdik.

Duomodagi Quyosh Botishi

Uyga qaytishdan oldin biroz vaqtim qolgandi. Shuning uchun metro orqali Milan Duomosigacha bordim. Quyosh botishi Duomo va Galleria Vittorio Emanuele II’ni yoritayotganini ko‘rib hayratda qoldim. Bu joylar — Milanning eng mashhur sayyohlik nuqtalari. Odamlar suratga tushayotgan edi, lekin sayyohlar orasida firibgarlar ham borligini unutmaslik kerak — ehtiyot bo‘ling! Men esa go‘zal kadrlar, selfilar va Gucci hamda Louis Vuitton do‘konlari joylashgan mashhur ko‘chalardan video lavhalar oldim.

Uyga Qaytish: Poyezd yoki Avtobus

Ishdan so‘ng uyga avtobusga chipta oldim. Poyezd ham, avtobus ham qulay, lekin avtobus ancha qulayroq: o‘rindiqlar yotadigan, narxi ham arzonroq. Poyezdda esa oyoqlar uchun joy ko‘p, lekin ertalabki safarimda juda gavjum edi.

Kun Yakuni

Lampunyano avtobus bekatidan avtobusga o‘tirib, uyga yo‘l oldim. Yo‘l davomida Chempionlar Ligasi o‘yini bor edi — yaxshi vaqt o‘tkazdim. Shu tariqa Milandagi birinchi ish kunim iliq taassurotlar, yangi tanishuvlar va chiroyli manzaralar bilan yakun topdi.